भैरहवा । रुपन्देही जिल्लामा मौसमी प्रतिकूलताका कारण यसअघि घोषणा गरिएको सार्वजनिक बिदा खारेज गरिएको छ। गृह मन्त्रालयको निर्देशनपछि जिल्ला प्रशासन कार्यालय रुपन्देहीले आज (सोमबार) देखि जिल्लाका सम्पूर्ण सरकारी कार्यालय तथा सार्वजनिक सेवा सुचारु गरेको हो।
प्रमुख जिल्ला अधिकारी डा. टोकराज पाण्डेद्वारा जारी सूचना अनुसार, विपद् जोखिम तथा प्रतिकार्यमा संलग्न नरहेका जिल्लाहरूमा सार्वजनिक सेवा सुचारु गर्न गृह मन्त्रालयबाट निर्देशन प्राप्त भएको थियो। यसैका आधारमा रुपन्देहीका सबै सरकारी कार्यालय, संस्थान, स्थानीय तह र अन्य संघसंस्थाहरूलाई कर्मचारी उपस्थितिको व्यवस्था मिलाई सेवा प्रवाहलाई निरन्तरता दिन भनिएको छ। यसअघि असोज १९ र २० गते सार्वजनिक बिदा घोषणा गरिएको थियो।
