भैरहवा । सिद्धार्थनगर नगरपालिकाको कार्यालयमा क्यूआर कोड मार्फत राजस्व भुक्तानी गर्न सकिने भएको छ । राजस्व संकलनलाई ‘फेसलेस’ र ‘क्यासलेस’ बनाउने नगरपालिकाको नीति अनुरुप कार्यालयले बिहीवार देखि क्यूआर कोड मार्फत राजस्वको भुक्तानी गर्न सकिने व्यवस्था मिलाएको हो ।
कार्यालयले जारी गरेको सूचना अनुसार नगरापलिका कार्यालयको अन्र्तगत राजस्व प्रशासन शाखा, घरनक्सा शाखा र वडा कार्यालयहरुमा बुझाउनु पर्ने कर, शुल्क तथा दस्तुहरु क्यूआर कोड मार्फत भुक्तानी गर्न सकिनेछ । ‘प्रविधिको युगमा सेवाग्राहीहरु समय खर्चिदै कार्यालयमा आएर राजस्व बुझाउनु त्यती उपयुक्त होइन’, सिद्धार्थनगर नगरपालिकाका मेयर इश्तियाक अहमद खाँले भने, ‘जसकारण यसै वर्षदेखि राजस्व संकलन ‘फेसलेस’ र ‘क्यासलेस’ बनाउने नीति अनुरुप क्यूआर कोड मार्फत राजस्व भुक्तानीको सुरुवात गरिएको हो ।’
उनले नगरपालिका कार्यालयले नगरवासीको हितमा राम्रो योजनाहरु संचालन गरिरहेको र आगामी दिनहरुमा पनि गर्दै लैजाने बताए । सिद्धार्थनगर नगरपालिकाका प्रमुख प्रशासकीय अधिकृत जनक थापाले नगद प्रवाहलाई सरल मितव्यापी, पारदर्शी तथा प्रभावकारी बनाएर वित्तीय जोखिम न्यूनिकरण गर्नका लागि र नगरपालिकाको नीति अनुरुप क्यूआर कोड मार्फत राजस्व भुक्तानीको सुरुवात गरिएको बताए ।
नगरपालिको कार्यालय र वडा कार्यालयमा रकम भुक्तानी गर्दा भुक्तानी गर्नुपर्नेमा रकम अनुसार प्राप्त हुने छुट्टाछुट्टै कारोबार संकेत नम्बरको क्यूआर कोडमा सोझै रकम भुक्तानी गर्नका लागि सिद्धार्थनगर नगरपालिकाको कार्यालयले आग्रह गरेको छ ।
आफ्नो कर्तव्य/दायित्व बिर्सिदै नगरपलिकाको कार्यालयसँग विकासका योजनाहरु खोज्ने अधिकांश नगरवासीहरु अझै पनि करको दायरामा आएर कर बुझाउन चाहँदैनन् । जुन आन्तरिक राजस्व कार्यालय भैरहवामा राजस्व बुझाउने नगरवासीको तथ्यांकले समेत पुष्टि हुन्छ । करको दायरामा आएर कर बुझाउनका लागि नगरपालिकाको कार्यालयले समय-समयमा घरदैलो गर्दै आएको छ ।
