भैरहवा । भिम अस्पतालमा प्रसुतीका लागि आउने महिलाहरुलाई लक्षित गरि भैरहवामा क्रियाशिल ४ वटा लायन्स क्लबहरुले संयुक्त रुपमा तातो पानी बनाउने मेशीन हस्तान्तरण गरेका छन् ।
आईतबार एक कार्यक्रमका बिच लायन्स क्लब अफ सिद्धार्थनगर लेडी युथ, लायन्स क्लब अफ सिद्धार्थनगर लोटस, लायन्स क्लब अफ लुम्बिनी क्रियटिभ लेडी र लायन्स क्लब अफ सिद्धार्थनगर लेडी ग्लिमले संयुक्त रुपमा २ वटा मेशीन अस्पतालाई हस्तान्तरण गरेका हुन् ।
मेशीन ग्रहण गर्दै अस्पताल ब्यवस्थापन समितिका अध्यक्ष डा. अनन्तराज शर्माले प्रसुति कक्षमा महिलाहरुलाई तातो पानीको आवश्यकता रहेको समयमा मेशीन पाउनु खुशीको कुरा रहेको बताए । उनले लायन्स क्लबले समय समयमा अस्पताललाई अति आवश्यक पर्ने सामाग्रीहरु प्राप्त हुदै आएको बताए । अस्पताल प्रशासनले यस्ता प्राप्त सामाग्रीहरुलाई आवश्यकता अनुसार हिफाजत साथ प्रयोग गर्ने गरेको उनले बताए ।
कार्यक्रममा बोल्दै डिस्ट्रिक्ट ३२५ पी का जिल्ला गर्भनर अर्जुनमान सैजुले सहयोग गर्नलाई कुनै अवसर नै आवश्यक नरहेको बताए । उनले भैरहवा क्षेत्रमा क्रियाशिल लायन्स क्लबले आवश्यकता अनुसार सहयोग गर्न जानेको र यसलाई निरन्तरता दिनु पर्ने औल्याए ।
कार्यक्रममा डिस्ट्रिक्ट ३२५ पी का भिडिजी पुरुषोतम भक्त प्रधानाङ्ग, सेकेण्ड भिडिजी बलराम भट्टराई, जिल्ला सचिव विनोद खरेल, सल्लाहकार रुपमा हिराचन, एरिया चिफ दिपक कौशल, सहायक चिफ अभिनव मयुर कशौधन लगायतको उपस्थिति रहेको थियो । कार्यक्रमको सञ्चालन मनिषा थापा कसौधनले गरेकी थिईन् ।
