भैरहवा । जारी प्रधानमन्त्री कप पुरुष राष्ट्रिय क्रिकेट प्रतियोगितामा गण्डकी प्रदेशले नेपाल पुलिस क्लबलाई मात्र ९३ रनको लक्ष्य दिएको छ । अहिले सम्म अविजित रहेको पुलिसको अगाडी गण्डकीको प्रर्दशन कमजोर रह्यो ।
भैरहवाको सिद्धार्थ क्रिकेट रङ्गशालामा टस जितेर ब्याटिङ गर्ने निर्णय गण्डकीको लागि घातक रह्यो । पुलिसको बलरहरुको अगाडी गण्डकीका खेलाडीहरु निरिह देखिएका थिए । यद्दपी गण्डकीका अलराउण्डर अर्जुन कुमाल क्रिजको एक छेउमा जमे पनि अन्य ब्याट्सम्यानहरुको साथ पाउन सकेनन । अर्जुनले ६३ बल खेलेर ८ चौकाको सहयोगमा ४८ रन बनाए । यस्तै रोहित चन्द र सुवास भण्डारीले समान १० रन बनाउदा अन्य ब्याट्सम्यानहरु दोहोरो अंक समेत जोड्न सकेनन् ।
गण्डकीको टोलीलाई सस्तोमै समेट्न नेपाल पुलिस क्लबका ललित राजवंशीले ५ विकेट लिए । उनले ५.२ ओभरमा २ मेडेन सहित मात्र ७ रन खर्चिएर गण्डकीको मध्यक्रम भंग गर्न महत्वपूर्ण भूमिका खेले । यसै गरि गुलशन झाले ८ ओभरमा १ मेडेन सहित ४२ रन दिएर ४ विकेट लिए ।
