भैरहवा । सिद्धार्थनगर नगरपालिका वडा नम्बर ९ ले बार्षिक निति तथा बजेट योजना तर्जुमा वडा भेला सम्पन्न गरेको छ । वडामा रहेका अति आवश्यक योजना तथा कार्यक्रमहरु लाई प्राथमिकताको आधारमा सूचिकृत गर्ने उद्देश्य सहित बुधबार भेला सम्पन्न भएको हो ।
भेलामा सहभागीहरुले अझै पनि वडा नम्बर ९ मा पूर्वाधार विकासमै जोड दिएका छन् । वडा नम्बर ९ मा अझै पनि धेरै बाटोहरु कच्ची रहेको कारण उनिहरुलाई पक्की गर्न वडावासीले माग गरेका थिए । यस्तै लक्षित समुदायलाई सचेतना एवम उनिहरुलाई सीपमूलक तालीममा पनि सहभागीहरको जोड रहेको थियो ।
कार्यक्रममा बोल्दै सिद्धार्थनगर नगर पालिकाका प्रमुख प्रशासकिय अधिकृत जनक थापाले अन्य वडाको तुलनामा वडा नम्बर ९ सरसफाई र मानवीय विकासमा अग्रस्थानमा रहेको बताए । उनले अहिले नगरपालिकाले “ग्रीन, क्लिन र ईकोफ्रेण्डली” को अभियानमा अगाडी बढेकोले यसमा सहयोग गर्न आग्रह गरे । उनले यो अभियान नगरपालिकाको प्रयासले मात्रै पुरा नहुने भएकोले यसमा नागरिक स्तरबाट नै सहयोग गर्नुपर्ने बताए ।
“सिद्धार्थनगर नगर पालिका पूर्वाधारको हिसुाबले अन्य नगरपालिका भ्न्दा अगाडी नै देखिएको छ ।” थापाले भने “त्यसैले अब पूर्वाधार संगै मानविय विकासमा पनि जोड दिने गरि योजना छनौट गर्नुहोला ।”
थापाले वडाको विकासमा टोल सुधारको ठूलो महत्व हुने बताउदै वडा नम्बर यसमा नमूना नै रहेको बताए । उनले आगामी दिनमा टोल विकास संस्थाहरुलाई कसरी उत्प्रेरित हुने गरि काममा लगाउन सकिन्छ भन्ने ख्याल गरेर बजेट छुट्टयाइने बताए ।
कार्यक्रममा बोल्दै वडा नम्बर ९ का वडा अध्यक्ष शेषकान्त भण्डारीले टोल स्तरबाट नै आएको योजनाहरुलाई प्राथमिकतामा राखि बजेट बनाईने बताए । उनले अहिले वडामा ९७ लाखको सिलिङ्ग रहेको कारण यसैको दायरामा रहि योजना पेश गर्न सहभागीहरुलाई आग्रह गरे ।
वडा नम्बर ९ का वडा अध्यक्ष शेषकान्त भण्डारीको अध्यक्षता, प्रमुख प्रशासकिय अधिकृत जनक थापाको प्रमुख आतिथ्यतामा सम्पन्न वडा भेलामा वडा सदस्यहरु युवराज बराल, बसन्त प्रसाद भट्टराई, सविता हरिजन, ६ वटै टोल सुधार समितिका पदाधिकारी, राजनैतिक दलका प्रतिनिधि, बिद्यालयका प्रअ, अध्यक्ष लगायत वडावासीहरुको सहभागीता रहेको थियो । वडा सचिव अब्दुल रसिल पठानको सञ्चालनमा सम्पन्न कार्यक्रममा स्वागत वडा सदस्य बसुन्धरा शर्माले गरेकी थिईन ।
