भैरहवा । रुपन्देहीको दानव नदीमा बेपत्ता तीन जना बालक मध्ये एक जनाको शव भेटिएको छ भने समाचार तयार पार्दा सम्म २ जना अझै बेपत्ता बालकको खोजी हुन सकेको छैन । १४ वर्षिय राजन यादवको शव डुबेका स्थान नजिकै फेला परेको प्रहरी प्रवक्ता प्रहरी नायब उपरिक्षक सुरज कार्कीले जानकारी दिए ।
लुम्बिनी सांस्कृतिक नगरपालिका वडा नम्बर २ सानो अर्दौलाका तीन जना बालकहरु एक जना अन्य साथी संगै गाउँ नजिकैको दानव खोलामा पौडी खेल्न गएका थिए । गाउँ नजिकैको बगहा बाबा मन्दिर नजिकै नुहाउने क्रममा तीन जना बालकहरु नदीको गहिरो भागमा पुगेको प्रत्यक्षदर्शी एक बालकको भनाइ रहेको त्यहाका वडा अध्यक्ष ईनामुल्ला फकिरले जानकारी दिए । “बालकहरु सुरुमा नुहाउने ठाउमा सामान्य २/३ फिट गहिरो रहेको छ । त्यस लगत्तै नदी २० देखि २५ फिट गहिरो भएको छ ।” उनले भने “बालकहरु गहिरो भागमा पुगेर बेपत्ता भएका हुन् ।”
मृत अवश्थामा भेटिएका बालक राजन यादवको मूल घर त्यही रहे पनि उनि बाबु आमा सहित रूपन्देहीकै सैनामैना बस्थे । अहिले शिक्षकको आन्दोलनको कारण विद्यालयहरु विदा रहेको हुदा उनि दिन अघि मात्रै मूल घर आएका थिए । दुई दिन देखि भैरहवा तथा यस आसपास एक्कासी गर्मी बढेको छ । सोही क्रममा बालकहरु नदीमा नुहाउन गएको हुन सक्ने वडा अध्यक्ष फकिरले बताए । साँझ ६ बजे सम्म बेपत्ता बालकहरुको खोजी भईरहेको र उज्यालो हुदा सम्म खोजी कार्य गर्ने प्रहरी नायब उपरिक्षक सुरज कार्कीले बताए ।
बेपत्ता बालकहरुको खोजीमा नेपाल प्रहरी संगै शसस्त्र प्रहरी स्थानियहरु पनि खोजी कार्यमा लागेका छन् । रूपन्देहीमा दानव खोलामा डुबेर मंगलबार दिउसो तीन जना बालक बेपत्ता भएका थिए । लुम्बिनी सांस्कृतिक नगरपालिका वडा नम्बर–२ अर्दौलामा रहेको दानव नदीमा पौडी खेल्ने क्रममा लुम्बिनी सांस्कृतिक नगरपालिका वडा नम्बर २ बस्ने वर्ष १३ को उमेश यादव, वर्ष १४ राजन यादव र वर्ष १२ को मन्नु हरिजन बेपत्ता रहेकोमा १४ वर्षिय राजन यादवको शव भेटिएको हो ।
