अर्घाखाँची । जिल्ला प्रशासन कार्यालय, अर्घाखाँचीले सन्धिखर्क नगरपालिकाको बजार क्षेत्रमा पुनः कर्फ्यू आदेश जारी गरेको छ । जिल्ला सुरक्षा समितिको सिफारिसका आधारमा स्थानीय प्रशासन ऐन, २०२८ को दफा ६क बमोजिम भदौ २५ गते अपरान्ह ५:०० बजेदेखि भदौ २६ गते बिहान ६:०० बजेसम्मका लागि कर्फ्यू आदेश जारी गरिएको हो ।
प्रमुख जिल्ला अधिकारी गोपालप्रसाद अर्यालद्वारा जारी आदेशअनुसार, यसअघि जारी निषेधाज्ञा भदौ २५ गते अपरान्ह ५:०० बजेबाट खारेज गरी नयाँ कर्फ्यू आदेश लागू गरिएको छ । कर्फ्यू अवधिभर सन्धिखर्क नगरपालिकाको बजार क्षेत्रभित्र कसैलाई पनि आवतजावत गर्न, मेला, जुलुस, प्रदर्शन, सभा, बैठक वा घेराउ गर्न पूर्ण रूपमा निषेध गरिएको छ ।
कर्फ्यू लागु हुने क्षेत्र:
- पूर्व: सन्धिखर्क नगरपालिका वडा नं.१ नेपाल प्रहरीको सञ्चार कार्यालय बाहुनडाँडा
- पश्चिम: सन्धिखर्क नगरपालिका वडा नं.२ वडा कार्यालय-अर्घाखाँची आवासीय मा.वि., जनज्योति मा.वि. हुँदै बिहार बजार
- उत्तर: सन्धिखर्क नगरपालिका वडा नं.१ म्यालपोखरीसम्म
- दक्षिण: सन्धिखर्क नगरपालिका वडा नं.७ फुदवाङ्ग बजार, गच्छे बजार-ढोरपाटन सडक हुँदै सन्धिखर्क नगरपालिका वडा नं.२ को वडा कार्यालयसम्म
अत्यावश्यक सेवामा सहजीकरण : कर्फ्यूको आदेश अवधिभर अत्यावश्यक सेवाका साधनहरू (एम्बुलेन्स, दमकल, शव वाहन), स्वास्थ्यकर्मीका सवारी साधनहरू, सञ्चारकर्मीहरू, पर्यटक सवारी साधनहरू, मानव अधिकार तथा कूटनीतिक नियोगका सवारी साधनहरू, र हवाई टिकटको आधारमा हवाई यात्रुहरूको आवगमनमा सुरक्षाकर्मीहरूबाट सहजीकरण गरिने प्रशासनले जनाएको छ । जिल्ला प्रशासन कार्यालयले शान्ति सुव्यवस्था कायम राख्न सबैलाई सहयोग गरिदिन आग्रह गरेको छ।
