भैरहवा । ओमसतिया गाउँपालिकाले पालिकाको निर्णयानुसार सतियामाई मन्दिरमा लाग्ने सतियामाई मेलाको अवसरमा स्थानीय बिदा घोषणा गरेको छ । गाउँपालिकाद्वारा प्रकाशित सूचनाअनुसार, कार्तिक शुक्ल एकादशीदेखि पूर्णिमासम्म लाग्ने यस मेलाको पूर्णिमाका दिन, अर्थात् कार्तिक १९ गते बुधबार, गाउँपालिका अन्तर्गतका सम्पूर्ण कार्यालयहरू र विद्यालयहरूमा आकस्मिक सेवा बाहेक स्थानीय बिदा दिने निर्णय भएको छ।
गाउँपालिका अध्यक्ष मन्जित कुमार यादव (सोनु) ले "ओमसतियाको शान : सुन्दर, शान्त, समृद्ध गाउँपालिका हाम्रो अभियान" को नारा बोकेको यस गाउँपालिकाले स्थानीय संस्कृति र परम्परालाई सम्मान गर्दै यो निर्णय गरेको बताए। यो बिदाले स्थानीय बासिन्दालाई मेलामा सहभागी हुन र सांस्कृतिक परम्परालाई जगेर्ना गर्न प्रोत्साहन मिल्ने अपेक्षा गरिएको छ ।
