भैरहवा । भैरहवामा जारी प्रधानमन्त्री कप पुरुष राष्ट्रिय क्रिकेट प्रतियोगितामा त्रिभुवन आर्मीलाई २३१ रनको लक्ष्य दिएको छ । पहिलो जितको खोजीमा रहेको कोशीले आज सम्हालिदै मध्यक्रमको ब्याट्सम्यानहरुको सहयोगमा २३० रन बनाएको छ ।
भैरहवाको सिद्धार्थ क्रिकेट रङ्गशालामा टस जितेर ब्याटिङ रोजेको कोशीले ४९.३ ओभरमा सबै विकेट गुमाउदै उक्त स्कोर बनाउदा उसको लागि सुवन गहतराजले अर्धशतकले सहयोग गरे । सुवनले ५७ बल खेल्दै ७ चौकाको सहयोगमा ५१ रन बनाए । कोशीका दुई जना ब्याट्सम्यानहरु भने अर्धशतकबाट चुकेका छन् । सुजन थपलियले ५४ बलमा ४ चौका र २ छक्का प्रहार गर्दै ४२ रन बनाएर कुशल मल्लको शिकार बने । यसै गरि सोनु अन्सारीले ७४ बलमा ४ चौकाको सहयोगा ४४ रन बनाए ।
बलिङमा भने आर्मीका लागि सोमपाल कामीले ४ विकेट लिए । उनले ८ ओभरमा ३७ रन खर्चिदै ४ विकेट लिए । यस्तै साहब आलम र आकाश चन्दले समान २ विकेट लिदा कुशल मल्लले १ विकेट लिए ।
प्रतियोगितामा ३ खेल खेलेको कोशी अहिले सम्म जित निकाल्न सकेको छैन, अंक तालिकामा कोशी शून्य अंक सहित सबै भन्दा पुछारमा रहेको छ भने त्रिभुवन आर्मी अहिले सम्म आफुले खेलेको ३ वटै खेलमा जित निकाल्दै ६ अंक सहित प्रतियोगिताको शिर्ष स्थानमा रहेको छ ।
