भैरहवा । रुपन्देहीको भैरहवास्थित अञ्चलपुरमा जारी सातौं लुम्बिनी महोत्सव–२०८२ मा दर्शकको आकर्षण दिनप्रतिदिन बढ्दै गएको छ । मंसिर ३ गतेदेखि सुरु भएको महोत्सवमा शनिबार एकैदिन ३५ हजारभन्दा बढी र आइतबार करिब १० हजार दर्शकले अवलोकन गरेपछि आयोजकहरू उत्साहित भएका छन् । विशेषगरी नेपालमै पहिलोपटक भियतनामबाट ल्याइएको ‘जलपरी’, फिस टनेल, बालउद्यान तथा आइतबारदेखि सुरु भएको कुस्ती प्रतियोगिताले मेलालाई थप रोमाञ्चक बनाएको छ ।
मेला परिसरको सरसफाइ, बिछ्याइएको हरियो कार्पेट र व्यवस्थित वातावरणको आगन्तुकहरूले खुलेर प्रशंसा गरेका छन् । उद्योग व्यापार संगठन रुपन्देहीको आयोजनामा सञ्चालित यो महोत्सवले स्थानीय बजार तथा स्वदेशी वस्तुको प्रवद्र्धन गर्ने मुख्य उद्देश्य राखेको छ । मेलामा राष्ट्रिय तथा स्थानीय कलाकारहरूको प्रस्तुतिले पनि दर्शकलाई भरपुर मनोरञ्जन प्रदान गरिरहेको छ ।
महोत्सवमा ३ सय वटा स्टलहरू सञ्चालनमा छन् भने हालसम्म १ करोड रुपैयाँभन्दा बढीको कारोबार भइसकेको आर्थिक व्यवस्थापन समितिले जनाएको छ । आगामी मंसिर २१ गतेसम्म चल्ने यस मेलामा करिब १ लाख ५० हजार दर्शकको सहभागिता रहने र कुल ५ करोड रुपैयाँ बराबरको आर्थिक कारोबार हुने अपेक्षा आयोजकले गरेका छन् ।
