परासी । पश्चिम नवलपरासीको पाल्हीनन्दन गाउँपालिका–१ महेशपुरबाट भन्सार छली गरी भारतबाट अवैध रूपमा नेपालतर्फ ल्याउँदै गरेको मदिरा र कारसहित दुई जनालाई प्रहरीले नियन्त्रणमा लिएको छ। ईलाका प्रहरी कार्यालय महेशपुरबाट खटिएको चेकिङ टोलीले आइतबार UP32 UT 5689 नम्बरको कारमा राखी ल्याउँदै गरेको २७४ पिस ओल्ड मङ्क रम र कार नियन्त्रणमा लिएको हो ।
बरामद गरिएको मदिराको अन्दाजी मूल्य रु. ५ लाख ४८ हजार र कारको मूल्य रु. ३५ लाख गरी जम्मा रु. ४० लाख ४८ हजार बराबरको रहेको प्रहरीले जनाएको छ। नियन्त्रणमा लिइएका मदिरा र कारलाई आवश्यक कारबाहीका लागि भन्सार कार्यालय बुझाउन ईलाका प्रहरी कार्यालय महेशपुरमा राखिएको जिल्ला प्रहरी कार्यालय नवलपरासी (बर्दघाट-सुस्ता पश्चिम) ले जनाएको छ।
