कपिलवस्तु । कपिलवस्तुको खुनुवा नाका नजिकै नेपाल-भारत सीमाक्षेत्रमा एसएसबीले एक व्यक्तिलाई ठूलो परिमाणको नगद र शंकास्पद धातुसहित पक्राउ गरेको छ। पक्राउ पर्नेमा रूपन्देही सैनामैना नगरपालिका-५ का ५० वर्षीय नारायण प्रसाद घिमिरे रहेका छन् ।
भारतबाट नेपालतर्फ आउँदै गरेको डिएल १ सी एएच ३८२७ नम्बरको एर्टिगा कारलाई एसएसबीले रोकी जाँच गर्दा घिमिरेको झोलाबाट ५ किलो ९५ ग्राम सेतो धातु (चाँदी अनुमान गरिएको) र ५७.१४ ग्राम पहेँलो धातु (सुन हुन सक्ने अनुमान गरिएको) फेला परेको हो ।
साथै, उनको साथबाट भारतीय रुपैयाँ ५०० दरका ७५९ नोट र २०० दरका ४ नोट गरी कुल ३ लाख ८० हजार ३ सय रुपैयाँ पनि बरामद भएको छ। घिमिरेले आफू बुटवलस्थित बहिनीको घर जान लागेको बताएका छन्। उक्त कार नयाँ दिल्लीका राज शर्माको नाममा दर्ता रहेको बुझिएको छ। एसएसबी खुनुवा क्याम्प र स्थानीय प्रहरी चौकीले संयुक्त रूपमा घिमिरेलाई नियन्त्रणमा लिई थप अनुसन्धान गरिरहेको छ।
