भैरहवा। रुपन्देही क्षेत्र नम्बर ४ मा चुनावी सरगर्मी बढ्दै जाँदा राष्ट्रिय स्वतन्त्र पार्टीका उम्मेदवार कन्हैया बनियाले यस क्षेत्रको ऐतिहासिक र आर्थिक कायापलट गर्ने विस्तृत कार्ययोजना सार्वजनिक गर्नुभएको छ । दशकौँदेखि विकासमा पछाडि पारिएको मर्चवारलाई ५ वर्षभित्र आधुनिक र आत्मनिर्भर बनाउने योजना सहित बनिया अहिले निर्वाचनमा होमिनुभएको छ ।
सडक र यातायात– ५ वर्षमा समग्र मर्चवार कालोपत्रे
बनियाले पहिलो बँुदामै मर्चवारका सबै मुख्य सडक ५ वर्षभित्र कालोपत्रे गर्ने ग्यारेन्टी गर्नुभएको छ । ४ लेनको मुख्य सडक र रिङ रोड सम्पन्न गर्ने योजनासहित चक्किया घाट, मन्झरिया र कचरिहवा जस्ता आधा दर्जन स्थानमा पक्की पुल निर्माणको पहल गर्ने उहाँको प्रतिबद्धता छ । साथै, मर्चवारदेखि सदरमुकामसम्म १० वटा नियमित बस सेवा सञ्चालन गरी यातायातलाई सहज बनाइने उहाँले योजना बनाउनुभएको छ ।
स्वास्थ्यमा फड्को– २४ घण्टा एम्बुलेन्स र ५० शैयाको अस्पताल
मर्चवारमै आधुनिक सुविधा सम्पन्न ५० शैयाको अस्पताल निर्माण गर्ने र इन्डो–नेपाल सीमा क्षेत्रमा २४सै घण्टा आकस्मिक एम्बुलेन्स सेवा दिने योजना अघि सारिएको छ । विशेषगरी तराईमा समस्याका रुपमा रहेको सर्पदंशका लागि छुट्टै उपचार केन्द्र र हरेक क्षेत्रमा बर्थिङ सेन्टरको व्यवस्था गर्ने बनियाको योजना छ ।
कृषिमा आधुनिकीकरण– सिँचाइ र कोल्ड स्टोर
किसान बाहुल्य यस क्षेत्रमा ५ हजार हेक्टर जमिनमा सिँचाइ पुर्याउन मर्चवार लिफ्ट सिँचाइ र बेलबास–मर्चवार नहर कनेक्टिभिटीलाई प्राथमिकता दिइएको छ । छपियालाई ‘फिस फार्मिङ हब’ बनाउने र प्रत्येक पालिकामा कृषि संकलन केन्द्र तथा कम्तिमा दुईवटा ठूला कोल्ड स्टोर (शीत भण्डार) निर्माण गरी किसानको उत्पादनलाई राष्ट्रिय बजारसम्म पुर्याउने लक्ष्य राखिएको छ ।
शिक्षा र प्रविधि– ब्यागलेस शिक्षा र फ्री वाईफाई
उच्च शिक्षाका लागि मर्चवार बाहिर जानुपर्ने बाध्यता अन्त्य गर्न स्नातकोत्तर तहमा विज्ञान र सूचना प्रविधिको पढाइ सुरु गर्ने बनियाको प्रतिवद्धता छ । सरकारी विद्यालयमा डिजिटल शिक्षा प्रणाली लागू गर्दै विद्यार्थीलाई ‘ब्यागलेस’ (झोलामुक्त) बनाउने र क्षेत्रभरि ‘फ्री वाईफाई जोन’ निर्माण गरी डिजिटल मर्चवार अभियान चलाइने उहाँले बताउनुभयो ।
पर्यटन र वैदेशिक व्यापार– फास्ट ट्रयाक र भन्सार सुधार
मर्चवारीमाई मन्दिरलाई राष्ट्रिय सम्पदामा सूचीकृत गराई लुम्बिनीदेखि मर्चवारसम्म ‘फास्ट ट्रयाक’ बनाउने योजना छ । थुम्हवा छोटी भन्सारलाई पुनः सञ्चालनमा ल्याई ककरहवा–कालीदह नाकाबाट आयात–निर्यात ट्रान्जिट प्वाइन्ट विस्तार गर्ने योजनाले स्थानीय अर्थतन्त्रमा ठूलो टेवा पुग्ने उहाँको भनाई छ ।
सुशासन र पारदर्शिता– भ्रष्टाचारमा शून्य सहनशीलता
उम्मेदवार बानियाले जनताको पैसा जनताकै विकासमा खर्च हुने ग्यारेन्टी गर्दै सार्वजनिक लेखापरीक्षण गर्ने र सरकारी कार्यालयमा डिजिटल टोकन प्रणाली लागू गर्ने बताउनुभएको छ । भ्रष्टाचार विरुद्ध शून्य सहनशीलताको नीति नै आफ्नो मुख्य एजेण्डा भएको उहाँले प्रस्ट पार्नुभएको छ ।
मुख्य आकर्षणहरुः
मर्चवार रंगशाला र क्रिकेट एकेडेमीको निर्माण ।
छोरी शिक्षा पूर्ण निःशुल्क र महिला आत्मनिर्भरता कार्यक्रम ।
दानव नदीमा तटबन्ध निर्माण गरी बाढी नियन्त्रण ।
महदेइया विद्युत सब–स्टेशन पूर्ण सञ्चालन र सोलार ऊर्जा प्रवद्र्धन ।
मर्चवार क्षेत्रको चौतर्फी विकासका लागि ‘घण्टी’ चुनाव चिह्न लिएर चुनावी मैदानमा उत्रिनुभएका बनियाले यसपटक मतदाताले परिवर्तनको पक्षमा मतदान गर्ने विश्वास व्यक्त गर्नुभएको छ ।
