अर्घाखाँची । सन्धिखर्क नगरपालिकाका नगरप्रमुख कृष्णप्रसाद श्रेष्ठले नागरिकहरूको चाहनाअनुसार औषधि व्यवसायीहरूले काम गर्नुपर्नेमा जोड दिएका छन्। सन्धिखर्कमा आयोजित औषधि व्यवसायीका प्रतिनिधि, सरोकारवाला स्वास्थ्यकर्मी, सञ्चारकर्मी र सुरक्षाकर्मीसहितको बैठकलाई सम्बोधन गर्दै नगरप्रमुख श्रेष्ठले न्यूनतम सेवाग्राहीलाई औषधि व्यवसायीहरूले १० देखि १५ प्रतिशतसम्म छुट दिन आग्रह गरेका हुन् ।
नगरप्रमुख श्रेष्ठले सन्धिखर्क जिल्ला सदरमुकामको नगरपालिका भएकाले यहाँ जिल्लाभरका नागरिक उपचारका लागि आउने गरेको बताए। उनले नागरिकहरूलाई उपचार खर्चमा सहुलियत छ भन्ने कुराको जानकारी दिन पनि व्यवसायीहरूले छुट दिनुपर्ने बताए। साथै, कार्यक्रममा उनले ल्याब शुल्कमा पनि एकरूपता कायम गर्न आग्रह गरेका छन्।
कार्यक्रममा औषधि व्यवसायी संघका जिल्ला अध्यक्ष रामप्रसाद अधिकारी, नगरपालिका स्वास्थ्य शाखा प्रमुख पूर्णप्रसाद पराजुली, निमित्त प्रमुख प्रशासकीय अधिकृत मञ्जु खनाल लगायतको उपस्थिति रहेको थियो। यस पहलले सन्धिखर्कका नागरिकहरूलाई औषधि र ल्याब सेवामा केही राहत मिल्ने अपेक्षा गरिएको छ।
