भैरहवा । भैरहवास्थित नेपाल विद्युत प्राधिकरणको रुपन्देहीस्थित नयाँमिल वितरण केन्द्र, मणिग्रामले आगामी भदौ २ गतेदेखि महसुल संकलन काउन्टर सेवा बन्द गर्ने भएको छ । डिजिटल भुक्तानीलाई प्रवर्द्धन गर्ने सरकारी नीति र ८१ प्रतिशत ग्राहकले अनलाइन माध्यमबाटै महसुल बुझाउन थालेपछि काउन्टर बन्द गर्न लागिएको केन्द्र प्रमुख रितेश गुप्ताले जानकारी दिएका छन् ।
यो निर्णयसँगै नयाँमिल वितरण केन्द्र डिजिटल भुक्तानी मात्र स्वीकार गर्ने प्राधिकरणको पहिलो कार्यालय बन्नेछ । विशेषगरी तिलोत्तमा नगरपालिकाका बासिन्दाले यस केन्द्रबाट सेवा लिँदै आएका छन् ।कार्यालयले अनलाइन भुक्तानीमा अभ्यस्त नभएका सेवाग्राहीका लागि डिजिटल वालेट कम्पनी तथा बैंकहरुसँगको सहकार्यमा 'हेल्प डेस्क' स्थापना गरी सहजीकरण गर्ने बताएको छ । गुप्ताका अनुसार, सेवाग्राहीहरुले बिहान ८ बजेदेखि राति १२ बजेसम्म कुनै पनि दिन अनलाइनमार्फत महसुल भुक्तानी गर्न सक्नेछन् । यो कदमले सेवाग्राहीको समय र अतिरिक्त खर्च बचत हुने अपेक्षा गरिएको छ ।
