भैरहवा । रोटरी क्लब अफ रुपन्देही, रोट्रयाक्ट क्लब अफ रुपन्देही र ओमसतिया गाउँपालिकाको संयुक्त आयोजना तथा नीता पोलीक्लिनिक मणिग्राम, रुपन्देहीको प्राविधिक सहयोगमा शनिबार ओमसतिया–४ स्थित बसन्तपुर प्राथमिक स्वास्थ्य केन्द्रमा बृहत स्वास्थ्य शिविर सम्पन्न भएको छ ।
एकदिने स्वास्थ्य शिविरमा विपन्न परिवारका सदस्यहरुलाई निःशुल्क स्वास्थ्य सेवा उपलब्ध गराउँदै परामर्श सेवा समेत प्रदान गरिएको आयोजकले जनाएका छन् ।
आयोजकका अनुसार एक दर्जन चिकित्सकहरुको सहभागीतामा भएको शिविरबाट ओमसतिया–४ का करिब ७ सय जना भन्दा बढीले प्रत्यक्ष रुपमा स्वास्थ्य सेवा लिएका थिए । शिविरमा विभिन्न प्रकारका रोग सम्बन्धी चेकजाँच तथा निःशुल्क औषधी वितरण समेत गरिएको थियो ।
कार्यक्रममा बोल्दै प्रमुख अतिथि लुम्बिनी प्रदेश सभा सदस्य अब्दुल रज्जाकले ओमसतियामा आएर स्वास्थ्य शिविर कार्यक्रम गरेको भन्दै आयोजकलाई धन्यवाद दिए । पूर्व राज्यमन्त्री समेत रहेका नेता रज्जाकले राजनीतिक अस्थिरताका कारण मुलुकको अर्थतन्त्र चलायमान हुन नसकेको बताए ।
कार्यक्रममा ओमसतिया गाउँपालिका उपाध्यक्ष सुनिता चौधरी, गाउँपालिकाका प्रवक्ता तथा वडा नम्बर ५ का वडाअध्यक्ष मदन पोखरेल, रोटरी क्लब अफ रुपन्देहीका अध्यक्ष हरि लम्साल लगायतले बोलेका थिए ।
ओमसतिया–४ का वडाअध्यक्ष अखिलेश्वर कुमार पाण्डेको अध्यक्षता, राम प्रसाद ढकालको स्वागत तथा दीपक ज्ञवालीको सञ्चालनमा सम्पन्न कार्यक्रममा वडा नम्बर ३ का वडाअध्यक्ष प्रकाश सिंह चौधरी ,ओमसतिया गाउँपालिकाका अध्यक्ष मन्जित कुमार यादव (सोनु), वडाअध्यक्षहरु, महिला स्वास्थ्य स्वयंसेविकालगायतको उपस्थिति रहेको थियो ।
