भैरहवा । रुपन्देहीको भैरहवामा जारी १२औं स्वर्गीय शेरबहादुर सेन्चुरी स्मृति अन्तरविद्यालय टी–२० क्रिकेट प्रतियोगितामा सोमबार शान्ति नमूना मावि र मणिमुकुन्द सेकन्डरी स्कूल फराकिलो अन्तरले विजयी भएका छन् । सिद्धार्थ क्रिकेट मैदानमा भएको पहिलो खेलमा शान्ति नमूनाले लुम्बिनी वर्ल्ड स्कूललाई ९ विकेटले पराजित गर्यो । टस हारेर ब्याटिङ गरेको लुम्बिनीले दिएको ७८ रनको लक्ष्य शान्ति नमूनाले ११.३ ओभरमा १ विकेट गुमाएर पूरा गर्यो ।
खेलमा ४ विकेट लिँदै अविजित ४१ रन बनाएका शान्ति नमूनाका रुद्रान्श भट्टराई ‘प्लेयर अफ द म्याच’ घोषित भए । त्यस्तै, दोस्रो खेलमा मणिमुकुन्दले श्री शतिया इङ्गलिस बोर्डिङ स्कूलमाथि १० विकेटको जित निकाल्यो । ५३ रनको सामान्य लक्ष्य मणिमुकुन्दले ५.२ ओभरमै पूरा गर्यो । खेलमा ६ विकेट लिनुका साथै १८ रन बनाएका मणिमुकुन्दका अर्पण तिमिल्सिना ‘प्लेयर अफ द म्याच’ बने । पर्वत ज्वेलर्सको प्रायोजन रहेको र पुस १ गतेसम्म चल्ने यस प्रतियोगितामा ३० विद्यालय सहभागी छन् । प्रतियोगिताको विजेताले ५० हजार र उपविजेताले २५ हजार रुपैयाँ पुरस्कार प्राप्त गर्नेछन् ।
