जनकपुरधाम । मधेश प्रदेशका मुख्यमन्त्री सतिश कुमार सिंहले भारतको ७९औँ स्वतन्त्रता दिवसको अवसरमा सम्पूर्ण भारतीय जनता र भारत सरकारप्रति हार्दिक शुभकामना व्यक्त गर्नुभएको छ। शुक्रबार एक शुभकामना सन्देश जारी गर्दै मुख्यमन्त्री सिंहले नेपाल र भारतबीचको ऐतिहासिक, सांस्कृतिक र आत्मीय सम्बन्धलाई सम्मान गर्दै शुभकामना प्रकट गर्नुभएको हो।
मुख्यमन्त्री सिंहले आफ्नो सन्देशमा नेपाल–भारतको साझा स्वतन्त्रता र लोकतान्त्रिक संघर्षको प्रतीकको रूपमा रहेको हनुमाननगर जेल ब्रेकको ऐतिहासिक घटनालाई विशेष रूपमा स्मरण गर्नुभएको छ। उहाँले मधेश भूमिका प्रजातन्त्रवादी योद्धाहरूले भारतीय स्वतन्त्रता आन्दोलनका महानायक जयप्रकाश नारायण र राममनोहर लोहिया लगायतका स्वतन्त्रता सेनानीहरूलाई मुक्त गराएको साहसिक क्रान्तिले दुई देशको सम्बन्धलाई अझ मजबुत बनाएको उल्लेख गर्नुभएको छ। "भारतीय स्वतन्त्रता आन्दोलनको गौरवपूर्ण इतिहास र हनुमाननगर जेल क्रान्तिको स्मरण गर्दा म अत्यन्त गौरवान्वित छु," सन्देशमा भनिएको छ।
विसं २००० सालमा सप्तरीको हनुमाननगरमा भएको उक्त जेल तोड काण्ड भारतीय स्वतन्त्रता संग्रामको एक महत्त्वपूर्ण घटना मानिन्छ, जहाँ नेपाली क्रान्तिकारीहरूले भारतीय नेताहरूलाई ब्रिटिस शासनबाट मुक्त हुन सहयोग गरेका थिए।
मुख्यमन्त्री सिंहले स्वतन्त्रता दिवसले स्वतन्त्रता, समानता र लोकतान्त्रिक मूल्यहरूको रक्षा गर्दै आगामी पुस्तालाई समर्पण, त्याग र साहसको शिक्षा दिने अवसर प्रदान गर्ने बताउनुभएको छ। उहाँले नेपाल र भारतबीचको सम्बन्ध केवल छिमेकीको नभई साझा रगत, संस्कृति र इतिहासको गहिरो नाता भएको बताउनुभएको छ।
"आगामी दिनमा हाम्रो मित्रता, आपसी सहयोग र विकासको साझेदारी अझ मजबुत होस् भन्ने हार्दिक शुभकामना व्यक्त गर्दछु," मुख्यमन्त्री सिंहले आफ्नो सन्देशको अन्त्यमा भन्नुभएको छ। जनमत पार्टीका नेता सिंह २०८१ जेठ २५ गते मधेश प्रदेशको मुख्यमन्त्रीमा नियुक्त हुनुभएको थियो।
