नवलपरासी । हिन्दु र मुस्लिम धर्मावलम्बीहरूको साझा धार्मिक धरोहरका रूपमा परिचित मदार बाबा मेलाको तयारी अन्तिम चरणमा पुगेको छ । नवलपरासी पूर्वको बिनयी त्रिवेणी गाउँपालिका–६, परसैहियास्थित मदरिया पहाडमा लाग्ने यो ऐतिहासिक मेला यही माघ २४ गते शनिबारदेखि सुरु हुँदैछ।
मदार बाबा मजार संरक्षण संस्थाका अध्यक्ष जमालुदिन मियाँका अनुसार यो स्थल धार्मिक सहिष्णुताको अनुपम उदाहरण हो, जहाँ दुवै धर्मका मानिसहरूले एकसाथ श्रद्धापूर्वक पूजापाठ गर्ने गर्दछन् । मेलालाई व्यवस्थित बनाउन सुरक्षाकर्मी परिचालन, स्वयंसेवकको व्यवस्था, निःशुल्क स्वास्थ्य शिविर र सार्वजनिक शौचालय निर्माण लगायतका कामहरू गरिएको छ ।
मदार बाबाका मठाधिश गद्दीनशीन बाबा अमिरूल्लाह अन्सारीका अनुसार यहाँ साँचो मनले भाकल गर्दा मनोकामना पूरा हुने, दुःख कष्ट हट्ने र निःसन्तान दम्पतीले सन्तान सुख पाउने जनविश्वास रहिआएको छ। मेला सुरु हुनुभन्दा एक साता अघिदेखि नै महलवारी र परसैया क्षेत्रमा व्यापारीहरूको बाक्लो उपस्थिति रहेको छ । व्यवसायीहरूले अस्थायी टहरा निर्माण गरी व्यापारिक तयारी पूरा गरिसकेका छन् ।
