भैरहवा । जनता समाजवादी पार्टी (जसपा) नेपालले पार्टी निर्णय र अनुशासन उल्लंघन गरेको भन्दै लुम्बिनी प्रदेशका चारजना सांसदहरूलाई साधारण सदस्यसमेत नरहने गरी निष्काशन गरेको छ। निष्काशित हुनेमा वर्तमान मन्त्रीहरू सन्तोष कुमार पाण्डेय र भण्डारीलाल अहिरसहित प्रदेश सांसदहरू हेमा बेल्बासे केसी र आदेशकुमार अग्रवाल हुनुहुन्छ।
ललितपुरको बालकुमारीमा बसेको केन्द्रीय कार्यकारिणी समितिको बैठकले पार्टीको निर्णयविपरीत प्रदेश सरकारको पक्षमा मतदान गरेको र सरकारमा सहभागी भएको भन्दै उहाँहरूमाथि कारवाही गरेको महासचिव डा. सुरेन्द्र कुमार झाले जानकारी दिनुभयो । पार्टीले लहान नगरपालिकाका उपप्रमुख राम चलित्तर महतो, प्रदेश सभा सदस्य निर्मला तावा, खोटाङका समन्वय समिति प्रमुख सन बहादुर राई, पालिका उपाध्यक्षहरू विनोद नेम्वाङ र गुरुराज राईलगायत दर्जनाैँ वडाध्यक्ष तथा सदस्यहरूलाई पनि निष्काशन गरेको छ।
यसैबीच, जसपा नेपालले भोटेकोशी बाढीप्रभावितका लागि प्रधानमन्त्री राहत कोषमा २१ लाख रुपैयाँ सहयोग गर्ने, 'अग्रगामी मोर्चा' गठनलाई स्वागत गर्ने र भदौ २१ देखि २३ गतेसम्म विभिन्न जिल्लामा अगुवा कार्यकर्ता भेला तथा प्रशिक्षण सञ्चालन गर्ने निर्णयसमेत गरेको छ।
