भैरहवा । रुपन्देहीका प्रमुख जिल्ला अधिकारी डा. टोकराज पाण्डेले जिल्लाका व्यवसायीहरूलाई ढुक्क भएर व्यापार व्यवसाय सञ्चालन गर्न आह्वान गर्नुभएको छ । शुक्रवार बिहान भैरहवामा निकालिएको शान्ति सद्भाव र्यालीलाई सम्बोधन गर्दै प्रजिअ पाण्डेले मर्यादित र सुरक्षित ढङ्गले व्यवसायलाई अगाडि बढाउन आग्रह गर्नुभएको हो ।
हालैका दिनमा भएका आगजनी, लुटपाट र तोडफोडका घटनाहरूप्रति लक्षित गर्दै प्रजिअ पाण्डेले यस्ता घटनामा संलग्न व्यक्तिहरूमाथि कारबाही अगाडि बढाइएको जानकारी दिनुभयो । उहाँले घटनामा संलग्नहरूको भिडियो फुटेज र फोटो संकलन गरिएको र अब क्रमशः उनीहरूमाथि कारबाही गरिने बताउनुभयो ।
प्रजिअ पाण्डेले अब सडकमा आई अराजक गतिविधि निम्त्याउनेलाई बल प्रयोग गरिने चेतावनी समेत दिनुभएको छ । यस्ता व्यक्तिहरूको तत्काल भिडियो लगायतका प्रमाण लिई क्रमशः कारबाही गर्दै लैजाने उहाँले स्पष्ट पार्नुभयो । शान्ति सुरक्षा कायम गर्न र व्यापारिक वातावरणलाई सहज बनाउन प्रशासन कटिबद्ध रहेको सन्देश उहाँले दिनुभएको छ । यस र्यालीले जिल्लामा शान्ति र सद्भाव कायम राख्न तथा व्यवसायीहरूलाई निर्धक्क भएर आ–आफ्नो पेशा सञ्चालन गर्न प्रोत्साहित गर्ने अपेक्षा गरिएको छ ।
