चापाकोट । नेपाल प्रहरीको ७१ औँ प्रहरी दिवसका अवसरमा स्याङ्जाको इलाका प्रहरी कार्यालय चापाकोट र शीतलटार आमा समूहको संयुक्त आयोजनामा सरसफाइ कार्यक्रम सम्पन्न भएको छ। चापाकोट नगरपालिका–९ स्थित शीतलपार्कमा सञ्चालन गरिएको उक्त सरसफाइ कार्यक्रममा स्थानीय प्रहरी, शीतलटार आमा समूहका प्रतिनिधि तथा सर्वसाधारणको सहभागिता रहेको थियो।
प्रहरी र समुदायबीचको सम्बन्धलाई थप प्रगाढ बनाउनुका साथै सार्वजनिक स्थलको संरक्षण र स्वच्छता कायम राख्ने उद्देश्यले कार्यक्रम आयोजना गरिएको इलाका प्रहरी कार्यालय चापाकोटका प्रमुख प्रहरी नायब उपरीक्षक गणेश सापकोटाले जानकारी दिनुभयो। इलाका प्रहरी कार्यालय चापाकोटले शान्ति सुरक्षा कायम राख्नुका साथै समय-समयमा यस्ता विभिन्न सामाजिक तथा जनचेतनामूलक कार्यक्रमहरू सञ्चालन गर्दै आएको छ।
