भैरहवा । रुपन्देहीको भैरहवास्थित सिद्धार्थ क्रिकेट मैदानमा १२औं संस्करणको ‘स्वर्गीय शेरबहादुर सेन्चुरी स्मृति अन्तरविद्यालय टी–२० क्रिकेट प्रतियोगिता’ सुरु भएको छ । शुक्रबारदेखि सुरु भएको प्रतियोगिताको पहिलो दिन न्यु मुन एकेडेमी र एभरेष्ट स्कूलले जित हात पारेका छन् ।
पहिलो खेलमा न्यु मुन एकेडेमीले न्यु लाइट सेकेन्डरी स्कूललाई ८ विकेटले पराजित गर्यो । न्यु लाइटले दिएको ६६ रनको सामान्य लक्ष्य न्यु मुनले ७ ओभर ३ बलमै २ विकेट गुमाएर पूरा गर्यो । खेलमा ४ विकेट लिनुका साथै ३३ रन बनाएका न्यु मुनका आषिश यादव ‘प्लेयर अफ द म्याच’ घोषित भए ।
शुक्रबार नै भएको दोस्रो खेलमा एभरेष्ट स्कूलले मुनलाइट इङ्गलिस बोर्डिङ स्कूललाई ४ विकेटले हरायो । मुनलाइटले दिएको १ सय ४ रनको लक्ष्य एभरेष्टले १९ ओभर १ बलमा ६ विकेट गुमाउँदै पूरा गर्यो । यस खेलमा एभरेष्टका आदित्य देवकोटा ‘प्लेयर अफ द म्याच’ बने ।
रुपन्देहीका ३० वटा विद्यालय सहभागी यस प्रतियोगिताको विजेताले ५० हजार र उपविजेताले २५ हजार रुपैयाँ प्राप्त गर्नेछन् । पर्वत ज्वेलर्सको प्रायोजन रहेको यो प्रतियोगिता आगामी पुस १ गतेसम्म चल्ने खेल संयोजक उदयकुमार मल्लिकले जानकारी दिए ।
