चापाकोट । स्याङ्जाको चापाकोट नगरपालिका-४ पुम्दीमा गत जेठ २७ गते भएको टिप्पर दुर्घटनापछि फरार रहेका चालकलाई प्रहरीले नियन्त्रणमा लिएको छ। मल्याङ्कोटबाट घुर्लिचौर जाने बाटो निर्माणका लागि बालुवा लोड गरी जाँदै गरेको ग १ क ४४४६ नम्बरको टिप्पर उकालो सडकमा चिप्लिएर झन्डै १०० मिटर तल खस्दा उक्त दुर्घटना भएको थियो। पष्म NM RC JB योजना निर्माण कम्पनीको उक्त टिप्पर दुर्घटनामा परी एक जनाको मृत्यु भएको थियो भने एक जना घाइते भएका थिए।
दुर्घटनामा टिप्परका सहयोगी म्याग्दीको मालिका गाउँपालिका-५ देवीस्थानका २३ वर्षीय तिलक परियारको ज्यान गएको थियो। शरीरका विभिन्न भागमा चोट लागेका उनलाई उपचारका लागि गह्रौँ स्वास्थ्य केन्द्र वालिङ पुर्याइए पनि चिकित्सकले मृत घोषणा गरेका थिए। सोही दुर्घटनामा घाइते भएका सोही स्थानका १८ वर्षीय करन परियार भने हात र खुट्टाको उपचार पश्चात् स्वास्थ्य केन्द्रबाट डिस्चार्ज भइसकेका छन् । दुर्घटना लगत्तै प्रहरी चौकी मल्याङ्कोट र इलाका प्रहरी कार्यालय चापाकोटको टोलीले घटनास्थल पुगेर उद्धार कार्य गरेको थियो।
घटनापछि फरार रहेका दाङको शान्तिनगर गाउँपालिका-१ का २६ वर्षीय चालक रेषम बहादुर गिरीलाई प्रहरीले चापाकोट नगरपालिका-९ सुन्तलीटारस्थित कालिगण्डकी होटलबाट आषाढ १२ गते पक्राउ गरेको हो । इलाका प्रहरी कार्यालय चापाकोटका प्रमुख गणेश सापकोटाका अनुसार पक्राउ परेका चालकमाथि राखेर घटनाबारे थप अनुसन्धान अगाडि बढाइएको छ।
