भैरहवा । रुपन्देहीको मायादेवी गाउँपालिका–१ स्थित भानुभक्त कृषि सहकारी संस्थाले मल वितरणमा अनियमितता गरेको भन्दै स्थानीय ५७ जना किसानहरूले गाउँपालिका अध्यक्ष ध्रुवनारायण चौधरीलाई ज्ञापनपत्र बुझाएका छन् ।
सहकारीले सर्वसाधारण किसानलाई मल नदिई आफ्ना नातागोता र नजिकका व्यक्तिलाई मात्र वितरण गरेको तथा गाउँपालिकाले तोकेको दररेटभन्दा बढी मूल्य असुलेको आरोप किसानहरूको छ । स्थानीय युवा किसान रामअवतार यादवका अनुसार, सहकारीले आफूखुसी मल वितरण गर्नुका साथै अनियमितता गरेको छ ।
ज्ञापनपत्रमा उल्लेख भएअनुसार, गाउँपालिकाले ८५० रुपैयाँ तोकेको युरिया मलको लागि सहकारीले किसानसँग १ हजार रुपैयाँ असुलेर ९ सयको मात्र रसिद दिने गरेको छ । त्यस्तै, २३ सय रुपैयाँ तोकिएको डीएपी मलका लागि २५ सय रुपैयाँसम्म लिएको पाइएको छ । पीडित किसानहरूले नियम उल्लंघन गरी किसान ठग्ने सहकारीलाई आवश्यक कारबाही गर्न माग गरेका छन् ।
