भैरहवा । रुपन्देही प्रहरीले भारतबाट भन्सार छलेर अवैध रूपमा नेपाल भित्र्याउँदै गरेको ९ लाख ६० हजार रुपैयाँ बराबरको हार्डवेयर सामान र एउटा मोटरसाइकल नियन्त्रणमा लिएको छ । जिल्लाको मायादेवी गाउँपालिका–६, दुर्गोलियास्थित सीमा क्षेत्रबाट इलाका प्रहरी कार्यालय मझगवाको टोलीले लु १६ प ४४८४ नम्बरको मोटरसाइकलमा लुकाएर ल्याउँदै गरेको अवस्थामा महँगा धारा र सिंक मिक्सरहरू बरामद गरेको हो ।
बरामद गरिएका सामग्रीहरूमा ३ लाख ३६ हजारको धारा, ५ लाख ६४ हजारको सिंक मिक्सर र ६० हजार मूल्याङ्कन गरिएको मोटरसाइकल रहेका छन् । बरामद सामान र मोटरसाइकललाई आवश्यक कारबाहीका लागि भैरहवा भन्सार कार्यालय बेलहिया पठाइएको जिल्ला प्रहरी कार्यालय रुपन्देहीका डीएसपी सुरज कार्कीले जानकारी दिनुभयो । एसपी प्रदिप बहादुर क्षेत्रीले जिल्लाको कमाण्ड सम्हालेसँगै सीमा क्षेत्रमा तस्करी विरुद्ध अपनाएको शून्य सहनशीलताको नीतिका कारण अवैध गतिविधि नियन्त्रणमा प्रहरीलाई सफलता मिलिरहेको छ ।
