भैरहवा । जिल्ला प्रहरी कार्यालय रुपन्देहीले भन्सार छली र चोरी पैठारी नियन्त्रण अभियान अन्तर्गत पछिल्लो दुई दिनमा करिब १० लाख रुपैयाँ बराबरको अवैध सामान बरामद गरेको छ । प्रहरीले भदौ ३ र ४ गते जिल्लाका विभिन्न स्थानबाट कुल ९ लाख ८० हजार ८० रुपैयाँ बराबरको मालसामान नियन्त्रणमा लिएको हो ।
जिल्ला प्रहरी कार्यालय तथा मातहतका प्रहरी टोलीले गरेको विशेष चेकजाँचका क्रममा किराना सामग्री, लत्ताकपडा, कुखुरा, विद्युतीय उपकरण र मोटरसाइकल लगायतका सामानहरू बरामद गरिएको हो ।प्रहरीका अनुसार भदौ ३ गते मात्रै जिल्लाका विभिन्न स्थानबाट ५ लाख ६६ हजार ६८० रुपैयाँ बराबरको अवैध सामान बरामद गरिएको थियो । यसैगरी, भदौ ४ गते जिल्लाभर गरिएको चेकजाँचमा थप ४ लाख १३ हजार ४०० रुपैयाँ बराबरको भन्सार छलीका सामान नियन्त्रणमा लिइएको छ ।
बरामद गरिएका सामानहरूमा रोहिणी गाउँपालिकाबाट मोटरसाइकल, जेन्स टिसर्ट, बोइलर कुखुरा र थ्री-फेस कम्प्रेसर रहेका छन् । त्यसैगरी, सिद्धार्थनगर नगरपालिकाका विभिन्न स्थानबाट किराना सामग्री, साडी, लेडिज टप्स, मसाज गन, चप्पल, बिस्कुट, मसला, एलजी कम्पनीको वासिङ मेसिन, स्कुल जुत्ता र लेडिज चप्पल बरामद भएको छ । मायादेवी गाउँपालिकाबाट चिनीसहितको मोटरसाइकल पनि प्रहरीले नियन्त्रणमा लिएको छ ।
बरामद गरिएका सम्पूर्ण सामान आवश्यक कारबाहीका लागि भैरहवा भन्सार कार्यालय र पशु क्वारेन्टाइन कार्यालय, बेलहियामा बुझाइएको जिल्ला प्रहरी कार्यालय रुपन्देहीका प्रमुख एसपी प्रदीप बहादुर क्षेत्रीले जानकारी दिए । उनले जिल्लामा हुने कुनै पनि प्रकारको अवैध कारोबार र भन्सार छली नियन्त्रणका लागि प्रहरीको यो अभियान निरन्तर चल्ने बताएका छन् ।
