भैरहवा। भैरहवास्थित गौतम बुद्ध अन्तर्राष्ट्रिय विमानस्थल सञ्चालनमा सरकारले उदासीनता देखाएको भन्दै प्रतिनिधि सभामा गम्भीर आपत्ति जनाइएको छ । प्रतिनिधि सभाको बैठकमा बोल्दै सांसद पूनम कुमारी अग्रवालले विमानस्थल सञ्चालन नहुँदा निजी तथा सरकारी क्षेत्रको अर्बौँ लगानी जोखिममा परेको बताउनुभयो ।
सदनमा बोल्दै सांसद अग्रवालले विमानस्थल निर्माणका लागि सरकारी र निजी क्षेत्रबाट ठूलो लगानी भइसकेको उल्लेख गर्दै लगानीकर्ताहरू बैंकको ब्याजको मारमा परेका र गम्भीर मानसिक तनाव भोग्न बाध्य भएको बताउनुभयो । ठूलो लगानी भए पनि विमानस्थल अझैसम्म सुनसान रहनु दुःखी विषय भएको उहाँको भनाइ थियो ।
उहाँले संस्कृति, पर्यटन तथा नागरिक उड्डयन मन्त्रालयप्रति लक्षित गर्दै विमानस्थल सञ्चालनका लागि हालसम्म कस्ता ठोस कदम चालिए, कति उडानहरू गराउन सफलता मिल्यो र लगानीकर्ताको लगानी सुरक्षित गर्न के–कस्ता कार्यहरू भए भन्नेबारे स्पष्ट पार्न माग गर्नुभयो । सांसद अग्रवालले अब थप ढिलाइ नगरी सम्बन्धित मन्त्रालयले स्पष्ट कार्यतालिका निर्माण गरेर लगानीकर्ताहरूलाई आफ्नो लगानीप्रति आश्वस्त पार्नुपर्नेमा जोड दिनुभयो।
