झापा । झापाको बिर्तामोड नगरपालिका–५ मा गएराति भएको कुटपिटबाट एक युवकको मृत्यु भएको छ। मृत्यु हुनेमा बिर्तामोड–५ निवासी ३० वर्षीय जगन राजवंशी रहेका छन् । प्रहरीका अनुसार राजवंशी र केही व्यक्तिबीच झगडा भएको थियो । झगडाले उग्र रूप लिँदा राजवंशीमाथि कुटपिट भएको र उनी गम्भीर घाइते भएका थिए । उनलाई तत्काल उपचारका लागि बिएण्डसी अस्पताल, बिर्तामोड लगिएको थियो तर अस्पताल पुग्नेबित्तिकै चिकित्सकहरूले मृत घोषणा गरेका हुन् ।
जिल्ला प्रहरी कार्यालय, झापाका प्रहरी नायब उपरीक्षक खगेन्द्रबहादुर खड्काले घटनामा संलग्न भएको आरोपमा बिर्तामोड–५ का २६ वर्षीय हेमकुमार चौधरीलाई शिवशताक्षी नगरपालिका–७ बाट नियन्त्रणमा लिइएको जानकारी दिनुभयो । प्रहरीले घटनाको सम्बन्धमा थप अनुसन्धान गरिरहेको जनाएको छ ।
