भैरहवा । रुपन्देहीको कोटहीमाई गाउँपालिका कार्यालयमा अख्तियार दुरुपयोग अनुसन्धान आयोगको बुटवल कार्यालयले छापा मारी नदीजन्य पदार्थको ठेक्कासँग सम्बन्धित कागजातहरू नियन्त्रणमा लिएको छ। वडा नम्बर ५ स्थित बेनीघाटमा नमुना कन्सट्रक्सनले १६ लाख रुपैयाँमा १ लाख ७७ हजार ७ सय ७२ घनफिट उत्खननको ठेक्का पाएकोमा, अनुमति दिइएको भन्दा फरक स्थानमा घाटगद्दी गरेपछि अनियमितताको उजुरीका आधारमा अख्तियारले यो कदम चालेको हो। गाउँपालिकाका प्रमुख प्रशासकीय अधिकृत सतेन्द्र यादवले घटनाको पुष्टि गर्दै अख्तियारको टोलीले छानबिनका लागि कागजातको प्रतिलिपि लगेको जानकारी दिनुभएको छ।
अख्तियारको छापालगत्तै बसेको कार्यपालिकाको बैठकले फरक स्थानमा राखिएको नदीजन्य पदार्थ जफत गर्ने, ठेकेदारलाई कारबाही गर्ने र उत्खननमा प्रयोग भएका दुई वटा मेसिन नियन्त्रणमा लिने निर्णय गरेको छ। तर, अख्तियारले कदम चाल्नुअघि पालिकाले कुनै अनुगमन र कारबाही नगरेकाले यस घटनामा जनप्रतिनिधि वा कर्मचारीको मिलोमतो हुनसक्ने आशंका सरोकारवालाहरूले गरेका छन्। यसैबीच, पालिकाले जेठ २१ गते नै सूचना जारी गर्दै असार १ गतेदेखि २०८३ भदौ मसान्त सम्मका लागि नदीजन्य पदार्थको उत्खनन तथा संकलन कार्यमा पूर्ण रोक लगाइसकेको छ।
